Aldrei líflegra á markaðnum en nú

Það er mikið um að vera þessa dagana, segir Haukur Olavsson, verslunarstjóri í bóka- og ritfangaversluninni Griffli. Eins og fréttastofa sagði frá í hádeginu og hér á Vísi má gera ráð fyrir að bókakostnaður framhalds- og háskólanema hlaupi á tugum þúsunda á hverri önn að því gefnu að bækurnar séu keyptar nýjar.

Hrun krónunnar fyrir tveimur árum var ekki til þess að bæta úr skák, enda fjöldi bóka sem nemendur nýta sér keyptar að utan. Haukur segist reka skiptibókamarkað allt árið um kring. Hins vegar sé aldrei liflegra en einmitt á þeim tíma sem nú fer í hönd, þegar skólarnir eru við það að fara að byrja.

Griffill fagnar 30 ára afmæli um þessar mundir og þar á bæ hafa menn gert ýmislegt til þess að halda upp á tímamótin. Til dæmis var ákveðið í dag að bjóða 20% álag á skiptibækur þannig að þeir sem komu með bækur sem þeir heðu alla jafna fengið greiddar 5000 krónur fyrir fengu í dag greiddar sex þúsund krónur. Haukur segir að árangurinn hafi skilað um fjórum til fimm sinnum fleiri kúnnum í verslunina í dag en á sama tíma í fyrra. Hann ætlar að bregða á sama ráð á morgun og borga aukaálag fyrir bækurnar.