Skólabækur með sál ódýrari

Kostnaður framhalds- og háskólanema við bókakaup hleypur á tugum þúsunda, en töluvert er hægt að spara með því að kaupa bækur með sál.

Nemar eru nú margir hverjir farnir að hugsa til vetrarins og skipuleggja nám sitt þegar farið er að styttast í annan endann á sumrinu. Það er ekki ókeypis að stunda nám og eru kaup á kennslubókum drjúgur kostnaður í því sambandi.

Gera má ráð fyrir að bókakostnaður framhalds- og háskólanema hlaupi á tugum þúsunda á hverri önn að því gefnu að bækurnar séu keyptar nýjar. Hinsvegar hafa skiptibókamarkaðir sparað mörgum skildinginn í gegnum námsárin.

Í fréttatilkynningu frá vefsíðunni skiptibokamarkadur.is segir að á fyrsta starfsári síðunnar hafi námsmenn verslað um 10 þúsund bækur fyrir um 40 milljónir króna í gegnum síðuna. Nýjar hefðu bækurnar kostað um 80 milljónir og því megi gera ráð fyrir að námsmenn séu að spara töluvert með því að versla við síðuna. Það geti því munað töluverðum fjármunum á því að kaupa notaðar bækur auk þess sem seljendurnir fá eitthvað fyrir bækur sem annars hefðu legið ónotaðar í bókahillu.

Skiptibókamarkaður Eymundsson er einnig kominn á fullt á heimasíðu verslunarinnar sem státar sig af því að vera með eitt mesta úrval notaðra kennslubók. Tiltölulega auðvelt er að sjá úrvalið í Eymundsson á netinu en þar er einungis boðið upp á þá titla sem til eru í verslunum Eymundsson.

Og þá er bara að koma sér af stað, prenta út bókalistann og finna hagstæðustu verðin á skólabókunum. Þær lesa sig víst ekki sjálfar.