Upprætti tvær fíkniefnaverksmiðjur

Lögreglan upprætti nýlega tvær kannabisverksmiðjur. Annars vegar í húsi i Árbæ. Þar fundust tæplega 400 kannabisplöntur á ýmsum stigum ræktunar. Þrír karlar á þrítugsaldri voru handteknir í tengslum við rannsókn málsins.

Hins vegar var um að ræða ræktun í fjölbýlishúsi í austurborginni nýverið. Við húsleit á áðurnefndum stað fundust um 60 kannabisplöntur á lokastigi ræktunar. Um mjög fullkomna ræktun var að ræða og búnaðurinn eftir því. Á sama stað var einnig lagt hald á fartölvu en í henni reyndist vera óviðeigandi myndefni. Karl á fertugsaldri var yfirheyrður í tengslum við rannsókn málsins.

Lögreglan segir að fyrrgreindar aðgerðir séu liður í að hamla gegn sölu og dreifingu fíkniefna. Lögreglan minnir á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.