Perlan reykræst í nótt

Slökkviliðið á höfuðborgarsvæðinu var kallað að Perlunni um klukkan eitt í nótt eftir að brunavarnakerfið fór í gang. Tveir dælubílar mættu á vettvang en í ljós kom að reim í loftræstikerfi hafði slitnað og úr varð mikill reykur í kjallara Perlunnar.

Slökkviliðið reykræsti kjallarann en litlar sem engar skemmdir urðu á húsnæðinu fyrir utan reimina sem gaf sig.

Þá var mikið um sjúkraflutninga í nótt en um 20 einstaklingar voru færðir á spítala með sjúkrabíl, þar af sex með forgangsakstri. Ekki reyndist um alvarleg tilfelli að ræða og mest tengt ólátum í miðborginni.

Þess má geta að i gær voru sextán fluttir á spítala með sjúkrabifreiðum og því annasöm helgi hjá slökkviliðinu á höfuðborgarsvæðinu.