Á annað hundrað milljarðar sparast með evruaðild

Utanríkisráðherra segir ávinninginn af því að komast á evrusvæðið spari þjóðinni á annað hundrað milljarða á ári. Hann er sannfærður um að Íslendingar nái það góðum samningi við Evrópusambandið að aðild verði samþykkt í þjóðaratkvæðagreiðslu.

Ásmundur Einar Daðason þingmaður Vinstri grænna og formaður Heimssýnar sem berst gegn Evrópusambandsaðild, fullyrðir að Íslendingar séu ekki í eiginlegum samningaviðræðum við Evrópusambandið, heldur aðlögun að sambandinu. Þessi aðlögun sé hafin áður en þjóðin fái að greiða atkvæði um niðurstöðu samningaviðræðna. Utanríkisráðherra segir þetta rangt. Engin aðlögun eigi sér stað umfram það sem EES samningurinn geri ráð fyrir.

„Það sem við þurfum að gera er að vera reiðubúin með áætlanir um það hvernig við ætlum að takast á við ákveðnar kröfur sem kynnu að verða niðurstaða samningaviðræðna," segir Össur Skarphéðinsson utanríkisráðherra.

Utanríkisráðherra segist sannfærður um að Íslendingar muni að lokum samþykkja aðildarsamning þegar hann liggi fyrir. En kannanir að undanförnu benda til að meirihluti Íslendinga sé á móti evrópusambandsaðild. Hvernig getur ráðherra þá fullyrt að aðild verði samþykkt?

„Vegna þess að ég held að sá samningur sem menn gera verði töluvert betri en menn eru að halda fram núna," segir Össur. Það muni koma í ljós að ýmsar bábyljur sem andstæðingar aðildar hafi haldið fram, t.d. varðandi sjávarútvegsmál séu vitleysa.

Þá verði auðveldara að semja um landbúnaðinn en margir haldi fram. „Og það liggur auðvitað alveg ljóst fyrir að ef við gerumst aðilar að evrusvæðinu, sem er auðvitað það sem ég vildi, mun það spara íslensku þjóðinni á annað hundrað milljarða á hverju ári," segir utanríkisráðherra.

Á næstu vikum og mánuðum fer fram rýnivinna að hálfu ESB og íslenskra stjórnvalda á löggjöf Íslands og sambandsins. Össur segir að líkur séu á að samningar hefjist um landbúnaðarmál fyrir páska og um sjávarútvegsmálin næsta haust.