Vill að fjárlög séu gerð langt fram í tímann

Formaður Framsóknarflokksins, vill að fjárlög íslenska ríkisins séu unnin í fimm eða tíu ár fram í tímann i stað þess að vinna þau fyrir hvert ár.

Miðstjórnarfundur Framsóknarflokksins fer fram á Húsavík um helgina. Í ræðu sinni í gær gagnrýndi Sigmundur Davíð Gunnlaugsson, formaður Framsóknarflokksins, harðlega efnahagsstefnu og fjármálastjórn ríkisstjórnarinnar. Hann gerði grein fyrir máli sínu í þættinum Sprengisandi hjá Sigurjóni M. Egilssyni á Bylgunni í morgun.

„Við erum ekki að vinna fjárlagafrumvarpið rétt og með því á ég við að við erum ekki að hugsa þetta til nógu langs tíma," segir Sigmundur Davíð. Hann sagði að sparnaður í fjárlagafrumvarpinu núna gæti leitt til fjárhagslegs tjóns árin á eftir.

Þá sagði hann að það væri ekki gerður nægjanlega mikill greinarmunur á peningum sem færu annars vegar í fjárfestingu, einhverju sem geti skapað tekjur í framtíðinni, og því sem væri bara hrein og klár eyðsla. „Og það náttúrlega gefur ekki af sér góða raun til framtíðar ef menn gera ekki greinamun þar á," segir Sigmundur Davíð.