Harðari viðurlög við brotum á banni við áfengisauglýsingum

Álfheiður Ingadóttir, heilbrigðisráðherra, segir að þar sem ekki hafi tekist að draga nægjanlega mikið úr áfengisneyslu landsmanna verði að grípa til árangsríkari aðgerða. Hún vill að harðar verði tekið á brotum gegn banni við áfengisauglýsingum.

Þetta var meðal þess sem kom fram í setningarávarpi Álfheiðar á norrænni ráðstefnu um áfengis- og fíkniefnarannsóknir sem sett var í Reykjavík í gær og lýkur á morgun.

Álfheiður benti á að áfengisneysla á hvern íbúa, 15 ára og eldri, hefði næstum tvöfaldast á Íslandi frá 1980 til 2007, en það ár neytti hver landsmaður að meðaltali 7,5 lítra af hreinu áfengi. Í heilbrigðisáætlun til ársins 2010 hefði það verið eitt af helstu markmiðunum að minnka neysluna í fimm lítra á hvern landsmann. Þótt þetta markmið hefði ekki náð fram að ganga hefði sá árangur náðst að undanfarin ár hefði dregið úr áfengisneyslu ungmenna.

Álfheiður sagði að eitt af meginmarkmiðum nýrrar heilbrigðisáætlunar til ársins 2020 verði að koma í veg fyrir misnotkun áfengis- og fíkniefna. „Það er skoðun mín að við þurfum að finna aðrar leiðir og grípa til árangursríkari aðgerða til þess að ná markmiðum okkar. Við þurfum til dæmis að taka harðar á brotum gegn banni við áfengisauglýsingum. Þetta bann er ekki virt eins og þið getið víða séð þegar þið litist um í Reykjavík eða fylgist með sjónvarpi eða dagblöðum."