Hollendingar taldir tengjast misferli með þrjú tonn af kannabisi

Þrír hollenskir karlmenn eru í haldi lögreglu vegna rannsóknar hennar á fíkniefnamáli. Þeir eru taldir tengjast haldlagningu á þremur tonnum af kannabisefnum í Hollandi.

Rannsóknin er unnin í samvinnu við lögregluyfirvöld þar í landi.

Aðgerðin hér er víðtæk en að henni hafa komið lögreglu- og tollyfirvöld á Austurlandi auk lögreglumanna frá lögreglunni á höfuðborgarsvæðinu og embætti ríkislögreglustjóra sem og tollvarða frá Tollstjóranum í Reykjavík.

Mennirnir eru allir í áhöfn skips sem kom til hafnar á Seyðisfirði á laugardag en leit var gerð um borð í skipinu. Að beiðni sýslumannsembættisins á Seyðisfirði fer lögreglan á höfuðborgarsvæðinu nú með rannsókn málsins.

Lögreglan veitir ekki frekari upplýsingar að svo stöddu.