Brotist inn á lögreglustöðina á Eskifirði

Brotist var inn á lögreglustöðina á Eskifirði í síðustu viku. Yfirlögregluþjónn, sem Vísir ræddi við, sagði þjófinn hafa brotið stóra rúðu og farið þannig inn í húsakynni lögreglunnar.

Lögreglan var hinsvegar snögg á staðinn og handsamaði innbrotsþjófinn á vettvangi. Í ljós kom að bíræfni þjófurinn reyndist vera þrettán ára unglingur.

Samkvæmt upplýsingum frá yfirlögregluþjóninum var pilturinn handtekinn á fyrstu mínútunum eftir að hann braut sér leið inn enda öflugt þjófavarnakerfi á stöðinni. Tjónið er ekki verulegt en málið er að sjálfsögðu litið afar alvarlegum augum.

Mál piltsins hefur verið sent barnaverndaryfirvöldum til umfjöllunar.

Aðspurður hvort þetta sé eina skiptið sem brotist hefur verið inn á lögreglustöðina svaraði yfirlögregluþjónninn því til að þetta væri í annað skiptið. Hitt skiptið átti sér stað fyrir fjölmörgum árum síðan. Þá voru þjófarnir, líkt og nú, gripnir á vettvangi.