Var heilinn á bak við söluhæstu smáskífu Bretlands

„Ég man nú ekki hver greiðslan var en þetta hélt mér uppi í heilt ár í London. Og var borgin dýr þá. Umboðsmaðurinn minn sagði að þarna væru árslaunin komin,“ segir Óskar Páll Sveinsson, lagahöfundur og upptökustjóri, en hann var einn af heilunum á bak við söluhæstu smáskífu Bretlands á áratugnum sem var að líða að því er kemur fram í breska blaðinu The Sun. Óskar stjórnaði upptökunum á laginu Anything is Possible sem var lokalagið í fyrstu Idol-keppni Bretlands árið 2002. Will Young fór með sigur af hólmi í þeirri keppni en söngvararnir þrír sem voru í úrslitum sungu allir lagið. Sá sem hins vegar var krýndur popp-idol Bretlands fékk smáskífuna gefna út undir sínu nafni en Anything is Possible seldist í tæpum tveimur milljónum eintaka.

„Ég held að ég hafi fengið þrefalda platínu-plötu fyrir þetta og það gerist nú ekki oft,“ rifjar Óskar Páll upp en hann var á þessum tíma á mála hjá Sony í London. „Þótt ótrúlegt megi virðast þá þekkti ég aðeins til Will Young áður en hann byrjaði í þessari keppni. Hann vann nefnilega sem sendill hjá Sony og ég kannaðist aðeins við hann,“ segir Óskar sem viðurkennir að hann hafi ekki haft mikla trú á því að Will gæti unnið þessa keppni. „Nei, hann var eitthvað svo lítillátur og hógvær að maður trúði því einhvern veginn ekki að hann myndi standa uppi sem sigurvegari.“

Óskar kynntist einnig sjálfum Simon Cowell, hinum eitilharða dómara þáttanna, við upptökur á laginu og þeir unnu saman að nokkrum verkefnum eftir það. „Ég man eftir því að við vorum að klára hljóðblöndun lagsins þegar Simon, Nigel Lythgoe (aðalsprautan og einn af dómurum So you think you can Dance-þáttanna) og einhverjir aðrir komu í stúdíóið, vel við skál. Og þá lék Simon við hvurn sinn fingur og var mjög almennilegur. Hann veit hins vegar alltaf hvað hann vill og ég fékk einmitt mjög gott heilræði frá honum þá sem var: „never overestimate the public“, eða, ekki ofmeta hinn venjulega hlustanda. Við vorum þá að missa okkur í einhverju smáatriði.“ freyrgigja@frettabladid.is