Innlent

Tíu erlendir ferðamenn hætt komnir

Jón Hákon Halldórsson skrifar
Tíu erlendir ferðamenn voru hætt komnir þegar að bíll þeirra festist í Hólmsá á leið þeirra að Axarfossi á Mýrdalssandi í dag. Björgunarsveitirnar Stjarnan úr Skaftártungu og Björgunarsveitin Lífgjöf úr Álftaveri voru kallaðar út til aðstoðar en ferðamennirnir höfðu allir komist í land af sjálfsdáðum þegar að björgunarsveitamennirnir komu til þeirra. Samkvæmt upplýsingum frá Slysavarnarfélaginu Landsbjörg var mjög lélegt símasamband við svæðið og litlar upplýsingar bárust frá ferðafólkinu.



Þegar björgunarsveitirnar komu á staðinn voru ferðalangarnir orðnir kaldir og blautir eftir dvöl sína í rigningu á árbakkanum. Bíllinn, sem er bílaleigubíll, hafði flotið niður ánna og kerra sem hann dró var oltin. Mikið vatn var í ánni en mikið hefur rignt á svæðinu undanfarið. Björgunarsveitamenn fluttu fólkið til byggða og hressti það við með heitum drykkjum og húsaskjóli.



Ár á Suðurlandi eru vatnsmiklar um þessar mundir og beinir Slysavarnafélagið Landsbjörg þeim tilmælum til ferðafólks á fjallvegum að leggja ekki í árnar nema það hafi góða þekkingu á vöðum og sé á vel útbúnum bílum. Ekki ætti að leggja í fjallaferðir einbíla. Lítil umferð er um fjallvegi og því ekki víst að aðstoð berist fljótt.







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.