Ferðamenn skoða foss með rykgrímur

Erlendir ferðamenn þurftu að bera rykgrímur þegar þeir skoðuðu Seljalandsfoss í dag, svo mikil var gosaskan. Þeir upplifðu þetta þó engu að síður sem mikið ævintýri.

Öskumökkinn lagði um tíma yfir Seljalandsfoss í dag en hann er einn vinsælasti áningarstaður ferðamanna á Suðurlandi. Þegar við komum þar að var hópur sænskra ferðamanna að skoða fossinn og öskufallið dundi yfir. Margir kusu að vera með rykgrímur. Slík lífsreynsla virðist þó ekki gera ferðalagið neitt verra.

Á Hvolsvelli mættum við frönskum háskólaprófessor sem er hér við myndatökur í þágu eigin vísindastarfa. Hann hafði ætlað að tjalda en gisti á endanum í jeppanum skammt frá Markarfljóti og vaknaði svo upp í morgun við að eitthvað buldi á honum.

Í viðtali á Stöð 2 lýstu ferðamennirnir reynslu sinni sem heillandi ævintýri.