Elín Hirst styður Mæðrastyrksnefnd

Elín Hirst fréttamaður afhenti Ragnhildi Guðmundsdóttur, formanni Mæðrastyrksnefndar Reykjavíkur, í dag fyrsta eintakið af DVD diski af heimildamynd sinni Síðasta ferðin, sem fjallar um íslenska vesturfara.

Myndin var sýnd í Sjónvarpinu um páskana og hefur nú verið gefin út á DVD. Elín hefur ákveðið að 300 krónur af söluandvirði hvers disks renni til að hjálpa bágstöddum sem þurfa að leita til Mæðrastyrksnefndar eftir mataraðstoð.

Myndin fjallar um það þegar Elín sér fyrir tilviljun 120 ára gamla ljósmynd af íslenskri fjölskyldu í Vesturheimi á Vesturfarasetrinu á Hofsósi. Ljósmyndin leiðir hana óvænt á slóðir fjölskyldu hennar sem flutti úr Fellum á Héraði til Nýja Íslands í Manitóba árið 1878. Þá voru landflutningarnir frá Íslandi til Ameríku að hefjast.

Myndin verður til sölu í verslunum um land allt á næstunni. Útgáfuteiti var haldið í húsakynnum Mæðrastyrksnefndar við Hátún í dag en þangað var boðið öllum þeim sem venjulega þurfa að leita til nefndarinnar til að fá mataraðstoð vegna fátæktar. Konurnar í Mæðrastyrksnefnd buðu öllum upp á vöfflur með rjóma og heitt kaffi í tilefni dagsins.