Misbýður endurútreikningur Lýsingar

Hafdís Una Bolladóttir tók ásamt manni sínum 2 milljóna króna bílalán hjá Lýsingu árið 2006, gengistryggt og íslenskt til helminga.

Í byrjun júní það ár greiddu þau 31 þúsund krónur af láninu en hefðu átt að greiða rúmar 37 þúsund krónur. Af mismuninum, sem nemur rúmum sex þúsund krónum er þeim gert að greiða 5 þúsund krónur í vexti. Samtals greiða þau 250 þúsund krónur vegna vangreiddra afborgana og vaxta.

Þá hafa þau greitt tæpar 2,4 milljónir af 2 milljóna króna láni en eftirstöðvar eftir endurútreikning nema 1,4 milljónum króna.

„Mér var misboðið þegar ég skoðaði endurútreikninginn og fór með þetta til lögfræðings, því mér fannst þetta ekki geta passað, að við værum að borga vexti og verðbætur ólöglega. Það hefur ekki verið skrifað undir neitt þess eðlis og að við séum að borga vexti, himinháa vexti, aftur í tímann fyrir það bara að fá að greiða löglega af láninu finnst mér óásættanlegt," segir Hafdís.

Hún segir að starfsmenn Lýsingar hafi hlegið að sér þegar hún óskaði eftir leiðréttingu.

Hafdís segist alltaf hafa greitt allar sínar skuldir. Nú sé hún komin með nóg. „Mér hefur aldrei dottið í hug að borga ekki eitthvað eða flytja úr landi eða eitthvað svoleiðis en mér finnst bara stríða gegn betri vitund að borga þetta," segir Hafdís. Ekki hefur náðst í framkvæmdastjóra Lýsingar síðustu daga vegna málsins.

Hafdís mótmælti í dag og segist vera að mótmæla öllu. Bara hversu lítinn rétt við höfum og hvernig það á að láta millistéttina borga og borga og borga og við höfum engann rétt og það er enginn að vinna fyrir okkur finnst mér."