Nálin komin í pásu: Fiktað í útsendingarbúnaði

Útvarpsstöðin Nálin sem fór í loftið í sumar hefur verið lögð niður tímabundið. Einar Karl Gunnarsson, dagskrárstjóri Nálarinnar, segir að fiktað hafi verið í útsendingarbúnaði útvarpsstöðvarinnar með þeim afleiðingum að útsendingar trufluðust. Spurður hvort þetta hafi verið skemmdarverk segir Einar Karl: „Ég myndi ekki nota það orð. Ætli þetta hafi ekki bara verið slys," segir hann.

Nálin er í eigu Útvarps Sögu og deila stöðvarnar útsendingarbúnaði, en Einar Karl er sonur Arnþrúðar Karlsdóttur, útvarpsstjóra Útvarps Sögu. Útsendingar hjá Sögu urðu einnig fyrir truflunum en búnaðurinn hefur nú verið lagaður. Einar Karl segir að hann hafi hins vegar ákveðið að nota tækifæriið til að endurskipulaggja starfsemi Nálarinnar fyrst hvort eð er þurfti að gera hlé á útsendingum. Hann segist stefna að því að útsendingar hefjist að nýju þann 1. desember.

Einar Karl vill lítið tjá sig um nákvæmlega hvað var gert við útsendingarbúnaðinn og hefur engan grunaðan um verknaðinn. „Þetta var bara einhver Jón Jónsson úti í bæ," segir hann. Um tvær vikur eru síðan fiktað var í búnaðinum, sem er í Kringlunni 7, en að sögn Einars Karl var þetta í fyrsta og eina skipti sem Nálin og Útvarp Saga verða fyrir slíku.

Nálin sérhæfði sig í klassísku rokki en auk þess var þar spilaður djass og blús, auk spjallþátta.

Að sögn Einars Karls er Nálin algjörlega fjármögnuð með auglýsingasölu og segir hann að reksturinn hafi borið sig. Eins og aðrar útvarpsstöðvar greiddi Nálin einnig stefgjöld. „Við höfum náð að standa í skilum með þau en það hefur verið tæpt," segir Einar Karl.

Hann hefur haft mjög gaman af því að stýra útvarsstöð og segist hafa fengið mjög góð viðbrögð hjá bæði ungum og öldnum. Einar Karl segist því hlakka til að fara aftur í loftið eftir mánuð.