Formaður VM segir Framtakssjóðinn brjóta reglur

Reglur hafa verið brotnar í starfsemi Framtakssjóðs Íslands, segir Guðmundur Ragnarsson, formaður Vélstjóra- og málmiðnaðarfélag Íslands. Hann segir að lífeyrissjóðir hafi verið settir upp vði vegg með að setja meira fjármagn inn í sjóðinn án þess að þeir hafi getu til að leggja mat á fjárfestingarnar.

„Opið og gagnsætt ferli hefur ekki verið í gangi hjá sjóðnum og þeim sem hann er að eiga sín stærstu viðskipti við, þó báðir aðilar hafi boðað það í vinnureglum sínum. Peninga lífeyrissjóðanna á ekki að nota til að fjármagna verkefni þar sem ekki kemur til baka raunvirði þeirra með ásættanlegri ávöxtun. Hvorki til að reka atvinnubótavinnu né félagsleg velferðaverkefni, þeir peningar verða að koma frá öðrum. Peningar einstaklinga í lífeyrissjóðunum eru þeirra eign og heilagir og enginn á að geta ráðstafað þeim í annað en góða ávöxtun til að tryggja sjóðfélögum sem bestan lífeyri í framtíðinni," segir Guðmundur í pistlinum.

Í lok pistils síns spyr Guðmundur hvar hið Nýja Ísland sé sem til hafi staðið að byggja upp með nýju siðferði og nýjum vinnubrögðum.