Rítalínkostnaður Sjúkratrygginga hefur stóraukist

Kostnaður Sjúkratrygginga vegna Rítalíns og skyldra lyfja við ADHD stefnir í að fara upp undir átta hundruð milljónir króna í ár, og hefur þrefaldast á fjórum árum.

Ýmis lyf eru notuð við ofvirkni og athyglisbresti, ADHD, og er rítalín líklega þeirra þekktast. Greint er frá því í dag í fréttabréfi Sjúkratrygginga að kostnaður Sjúkratrygginganna vegna slíkra lyfja stefni í yfir 760 milljónir króna. Lang stærstur hluti kostnaðarins er vegna rítalsíns og lyfja með svipaða virkni. en hann fór hátt í hálfan milljarð króna í fyrra, og er þessi flokkur lyfja sá kostnaðarsamasti hjá sjúkratrygginum.

En þessi kostnaður hefur farið mjög vaxandi undanfarin ár. Árið 2006 greiddu sjúkratryggingar um 200 milljónir fyrir vegna rítalíns og skyldra lyfja. Í heildina, segja sjúkratryggingar að kostaður við lyf við ofvirkni og athyglisbresti hafi um þrefaldast frá árinu 2006.

Um 2700 börn og ungingar undir tvítugu fá svona lyf, en sjúkratryggingar vekja athygli á því að fimmtán hundruð fullorðnir fái þessi lyf einnig. Mesti vöxturinn í kostnaði vegna þessara lyfja sé vegna fullorðinna. Upp undir helmingur kostnaðar vegna rítalíns og skyldra lyfja hafi verið vegna þeirra.

Geir Gunnlaugsson, landlæknir, sagði í fréttum stöðvar tvö fyrir skömmu, að kanna ætti sérstaklega ávísanir lækna á þessi lyf til fullorðinna.