Rannsaka spillingu hjá FIFA

Alþjóða Ólympíunefndin, IOC, hefur ákveðið að rannsaka mál varaforseta FIFA, Issa Hayatou, ofan í kjölinn þar sem hann er ekki bara varaforseti FIFA heldur einnig meðlimur í IOC.

BBC var með umfjöllun á dögunum þar sem fram kom að hann hefði þegið mútur ásamt tveimur öðrum fulltrúum FIFA.

FIFA hefur ekki viljað taka á málinu og segir ásakanirnar rangar.

Alþjóða Ólympíunefndin hefur aftur á móti ákveðið að taka málið föstum tökum og hefur beðið BBC um að lána sér öll gögn í málinu.

"Alþjóða Ólympíunefndin mun aldrei sætta sig við spillingu og þess vegna verður málið skoðað," sagði í yfirlýsingu frá nefndinni.