Tæknileg mistök hluti af skýringunni

Innspil lagsins, svokallað „playback“ Eurovision-lagsins In the Future var of lágt stillt þegar Karen Pálsdóttir, sextán ára söngkona, flutti það í Söngvakeppni Sjónvarpsins á laugardagskvöld. Umrætt atriði hefur verið mörgum hugleikið í netheimum og var þeirri umræðu gerð sérstök skil í Kastljósi Ríkissjóvnarpsins á miðvikudagskvöld en flutningur á laginu heppnaðist ekki alveg sem skyldi.

Þegar umrætt „playback“ er of lágt getur það gerst að söngvarar eiga erfiðara um vik með að greina rétta tóntegund. Reyndir söngvarar eru yfirleitt með hana í kollinum og vilja hafa „playback“ fremur lægra en hærra. Erfiðara getur hins vegar reynst fyrir unga og óreynda listamenn ef þeir eru ekki alveg öruggir á því hvernig það eigi að vera.Söngkonan Margrét Eir Hjartardóttir, sem hefur þjálfað Karen að undanförnu, staðfesti við Fréttablaðið að umrætt „playback“ hefði verið of lágt og höfundar lagsins, þau Bryndís Sunna Valdimarsdóttir og Daði Georgsson, sögðu bæði í samtali við Fréttablaðið að þau hefðu strax gert sér grein fyrir því að ekki væri allt með felldu. Of seint hefði þó verið að grípa inn í. Bryndís bendir á að bakraddasöngkonurnar hefðu byrjað í vitlausum tón og dansararnir hefðu átt erfitt með að finna rétta taktinn.

Þórhallur Gunnarsson, dagskrárstjóri RÚV, segir tæknimenn Sjónvarpsins vera að fara yfir útsendinguna og að eflaust megi eitthvað við hana lagfæra. Upptaka með atriðinu hefur nú verið fjarlægð af myndbandsvefnum YouTube en það voru lagahöfundarnir sem fóru fram á það við forsvarsmenn vefsíðunnar. „Við gerðum þetta að ósk Karenar og fjölskyldu hennar og vildum minnka það að fólk væri að klippa búta úr laginu og nota í annarlegum tilgangi,“ segir Daði. Fréttablaðið hafði í gær samband við föður Karenar, Pál Róbertsson, en hann upplýsti að þau myndu ekkert tjá sig um málið að svo stöddu.

Upp hefur komið sú umræða að hækka aldurstakmarkið vegna umrædds atviks en Þórhallur segir þetta hafa getað komið fyrir hvernig sem er, hvort sem söngvarinn væri átján eða sextán ára. „Aldur er ekkert aðalmálið í þessu heldur sú staðreynd að þetta getur komið fyrir hvern sem er.“-

freyrgigja@frettabladid.is