Faust Vesturports fer á svið

Í kvöld frumsýnir Vestur­port útgáfu sína af Faust í Borgarleikhúsinu. Sagan er aldagömul og ættuð frá Þýskalandi.

Fjöldinn allur af útgáfum af Faust hefur verið sviðsettur, kvikmyndaður og sunginn. Leikrit Goethe er þekktast, en aðrar útgáfur eru til dæmis skáldsagan Doctor Faustus eftir Thomas Mann og Meistarinn og Margaríta eftir Mikhaíl Búlgakov, sem styðst við söguþráðinn. Fjörutíu ár eru síðan sagan um Faust fór síðast á leiksvið á Íslandi.

Í leikritinu segir frá Faust. Hann er leikinn af Þorsteini Gunnarssyni og Birni Hlyni Haraldssyni, sem leikur hann á yngri árum. Faust er kominn á efri ár þegar hann uppgötvar að líf hans hefur ekki alveg verið jafn hamingjuríkt og hann hefði viljað. Mefistó (Hilmir Snær Guðnason) freistar hans og segist geta kynnt hann fyrir sannri hamingju í hinu ljúfa lífi skemmtunar og nautna. Faust tekur boðinu og handsalar veðmálið með því skilyrði að ef hann finni hamingjuna undir handleiðslu Mefistós, þá eignast djöfullinn sál hans. Veðmálið verður fyrst tvísýnt þegar Faust kynnist hinni hreinu, saklausu Grétu (Unnur Ösp Stefánsdóttir) sem dregst inn í þessa eilífu baráttu góðs og ills.

Búast má við mögnuðu sjónarspili og háloftaatriðum. Fundnir eru ferskir listrænir fletir á efniviðnum. Sýn leikstjórans Gísla Arnar Garðarssonar er óbeisluð og fer á flug með leikurunum í óhefðbundinni leikmynd Axels Hallkels Jóhannessonar. Frumsamin tónlist Nicks Cave og Warrens Ellis rekur svo smiðshöggið á verkið.

Áhorfendur mega búast við að sjá þessa klassísku sögu lifna við og skína í alveg nýju ljósi í meðförum Vesturports.- drg