Borgin vill minnka hraða á Hringbraut

Borgaryfirvöld og Vegagerðin eiga í viðræðum um aðgerðir til að minnka slysahættu á ákveðnum kafla Hringbrautar. Um er að ræða þann hluta vegarins sem er á mörkum Miklubrautar og Hringbrautar við Bústaðavegsbrúna. Vegagerðin vill setja upp vegrið á svæðinu en borgaryfirvöld hallast að því að lækka umferðarhraða á svæðinu.

Nokkur umferðarslys hafa átt sér stað á þessum kafla Hringbrautarinnar og eru menn á einu máli um að auka þurfi öryggi á staðnum.

„Við höfum rætt mikið um að lækka þurfi hraða á þessum kafla. Það er mat einhverra sem ég hef rætt við í ráðinu og skoðun mín sem stendur að í stað þess að setja upp vegrið sem veitir fólki þá tilfinningu að það geti keyrt hraðar, þá sé betra að reyna að láta fólk virða þann hámarkshraða sem er í götunni,“ segir Karl Sigurðsson, formaður umhverfis- og samgönguráðs Reykjavíkur, og bætir við að taka verði tillit til fleiri sjónarmiða en eingöngu þess að bílasamgöngur séu greiðar, svo sem heilsu og ánægju íbúa í nágrenni vegarins.

„Það mætti kannski fara í einhverjar lækkunaraðgerðir eða þá að sjá til þess að hraðinn haldist í sextíu kílómetrum á klukkustund með eftirliti,“ segir Karl.

Jónas Snæbjörnsson, umdæmisstjóri hjá Vegagerðinni, segir það standa til af hálfu Vegagerðarinnar að reisa vegrið á þessum vegarkafla. „Það er okkar hugmynd. Við ætlum nú að ræða aðeins betur við borgaryfirvöld en við teljum nauðsynlegt að gera þetta meðan aðrar betri hugmyndir hafa ekki komið fram,“ segir Jónas. „Við eigum eftir að fá samþykki borgaryfirvalda en ef svo ber undir gerum við þetta í óþökk þeirra.“

Einar Magnús Magnússon, upplýsingafulltrúi Umferðarstofu, telur óráðlegt að lækka hámarkshraða á staðnum. „Það að taka hraðann niður á afmörkuðum kafla stofnbrautar skapar mikla truflun á flæði umferðar og hættu. Það jafnframt dregur úr virðingu ökumanna fyrir leyfðum hámarkshraða þegar hann er algjörlega á skjön við vegaðstæður,“ segir Einar.

Spurður um þessa gagnrýni segir Karl Sigurðsson: „Þetta eru ákveðin sjónarmið en ég er ekki sammála þeim. Það er nú bara staðreynd að hámarkshraði er ekki virtur þarna eins og er og ég get ekki séð að menn muni bera minni virðingu fyrir honum verði hann lækkaður.“

magnusl@frettabladid.is