Ósátt við svör um Varnarmálastofnun

Mikill ágreiningur er innan verkefnastjórnar sem vinnu að því að leggja niður Varnarmálastofnun.

Eygló Harðardóttir, þingmaður Framsóknarflokksins hitti af þessum sökum Össur Skarphéðinsson utanríkisráðherra og Ögmund Jónasson dómsmálaráðherra á fundi utanríkismálanefndar í dag þar sem farið var yfir stöðu mála. Fundurinn fór fram í trúnaði.

Eygló sagði í samtali við fréttastofu að hún væri ósátt við svör ráðherra um niðurlagninu stofnunarinnar sem hún fékk á fundinum. Eygló segir störf fimmtíu starfsmanna í uppnámi vegna óvissuástandsins. Hún hefur því óskað eftir skriflegri greinargerð um framtíð stofnunarinnar.

Spurð um hvað ágreiningurinn snýst svarar Eygló því til að það sem fram kom á fundinum hafi verið trúnaðarmál.

Það sem hún viti hinsvegar, og hefur heimildir annarstaðar frá um, er að verkefnastjórnin deilir um það hvort færa eigi verkefni Varnarmálastofnunnar til Ríkislögreglustjóra og Landhelgisgæslunnar eða að láta Isavia, áður Flugstoðir, sjá um verkefnin.

„Þetta staðfestir nefndarálit okkar um málið um að það sé ótímabært að leggja stofnunina niður," segir Eygló sem bætir við að þarna sé einnig um að ræða 50 starfsmenn sem þurfa að þola mikla óvissu.

„Það er mikið óöryggi hjá starfsmönnum vegna þessa," segir Eygló.

Þá bendir hún einnig á að það sé sérkennilegt að ríkisstjórnin skuli valda slíkri óvissu á svæði sem hefur farið illa út úr efnahagsástandinu og mikið atvinnuleysi ríkir á.