Íslenskir jeppar á methraða á pólinn

Hlynur Sigurðsson, starfsmaður frá íslenska fyrirtækinu Arctic Trucks, er á heimleið eftir jeppaferð á suðurpólinn. Talið er að hraðamet hafi fallið í ferðinni þar sem 2.300 kílómetrar voru lagðir að baki á fjórum og hálfum sólarhring.

Hlynur, sem var bílstjóri og bifvélavirki í ferðinni, komst á pólinn aðfaranótt fimmtudags en var utan símasambands þegar fréttin var unnin. Hallveig Andrés­dóttir, hjá Arctic Trucks, segir hins vegar í samtali við Fréttablaðið að ferðin hafi gengið að óskum. Sérútbúnir Hilux-jepparnir hafi reynst vel.

„Þessir bílar voru smíðaðir hér á Íslandi í sumar og prófaðir hér, en eru í eigu manna frá Kasakstan sem eru að undir­búa annan og stærri leiðangur á næsta ári.“

Þetta er annar leiðangurinn á stuttum tíma þar sem bílar Arctic Trucks ferja menn á pólinn, en undir lok síðasta mánaðar fór Eyjólfur Már Teitsson með hóp indverskra vísindamanna sömu leið.

Hallveig segir að þriðji leiðangurinn leggi af stað á næstu dögum. Þar verður meðal annars í fyrsta sinn prófaður sex hjóla Hilux, en bílar fyrirtækisins hafa getið sér gott orð og eru nú tólf talsins á Suðurskautslandinu.

„Við höfum verið þarna í þrjú ár og erum alltaf að sanna okkur betur á þessum slóðum,“ segir hún. „Þau tæki sem hafa hingað til verið notuð þar eru miklu stærri og þunglamalegri og eyða margfalt meiri olíu en okkar bílar þannig að það eru ekki bara aukin þægindi, heldur eru þeir líka miklu umhverfisvænni.“

Eyjólfur stóð á pólnum með fyrsta leiðangrinum hinn 23. nóvember og segir samtali við Fréttablaðið að upplifunin hafi verið einstök og um leið skemmtileg.

„Þetta var alveg mögnuð reynsla og mjög mikill kuldi. Svona hef ég aldrei upplifað áður. Frostið mældist mest um 56 stig, fyrir utan vindkælingu.“

Aðspurður sagði hann að vel hafi farið um ferðalangana. „Það er munur að sitja inn i í hlýjum bíl og hann fer vel með mann. Maður keyrir bara og hlustar á tónlist nema eitthvað komi upp á.“

Eyjólfur segist ekki enn hafa fengið tækifæri til að bæta norður­pólnum í safnið. „Þeir eru ekki margir sem hafa ekið á báða pólana, en ég væri alveg til í að tilheyra þeim hópi.“

thorgils@frettabladid.is