Eyjafjallajökull heltók heimsbyggðina

Gosið í Eyjafjallajökli síðasta vor er einn af fimm stærstu atburðum ársins á heimsvísu. Þetta kemur fram í árlegri úttekt leitarvélarinnar Google, en auk gossins voru talin til jarðskjálftinn á Haítí, Vetrarólympíuleikarnir í Vancouver, olíuslysið í Mexíkóflóa og Heimsmeistaramótið í knattspyrnu.

Þetta mat Google er metið eftir því hversu oft er leitað að fréttum sem tengjast ákveðnum atburðum en ekki eru til nákvæmar fjöldatölur um leitarbeiðnir.

Þetta þarf ekki að koma á óvart þar sem eldgosið, og öskuskýið sem því fylgdi, snerti milljónir manna um allan heim sökum raskana á samgöngum.

Í skýringu á vef Google sem ber yfirskriftina Zeitgeist, eða tíðarandinn, sést glögglega hvernig Eyjafjallajökull heltók heimsbyggðina smám saman um nokkurra vikna skeið áður en um fór að hægjast.

Á vef Google má einnig sjá hvað hefur hrifið net­verja það sem af er ári, en iPad, spjallkerfið Chat­roulette og ungstirnið Justin Bieber tóku hæstu stökkin frá fyrra ári. Svínaflensan og Susan Boyle voru hins vegar á meðal þeirra sem hrundu í netvinsældum. - þj