Straumur fólks til Stígamóta

Hópur eldra fólks hefur leitað til Stígamóta undanfarið vegna kynferðisofbeldis sem það kveðst hafa orðið fyrir og þaggað hafi verið niður í skjóli embættisvalds. Aðsóknin er svo mikil að þeir sem eru að koma í fyrsta skipti þurfa að bíða á þriðju viku áður en þeir komast að, sem er einstök staða. Þetta segir Guðrún Jónsdóttir, talskona Stígamóta.

„Þjóðfélagsumræðan að undanförnu um ofbeldi hefur hreyft mjög við fólki sem í áratugi hefur burðast eitt með leyndarmál sín," segir Guðrún. „Það er eins og fólki sé að detta í hug í fyrsta skipti að það geti átt rétt á uppreisn æru. Það leyfir sér að þrá staðfestingu á að brotið hafi verið á því."

Guðrún kveðst ekki hafa talið saman hversu margir nýrra skjólstæðinga hafi orðið fyrir ofbeldi í skjóli einhvers konar embættisvalds. Tölur um fjölda og eðli brota liggi ekki fyrir fyrr en í árslok.

„En mörg þessara mála snúast um ofbeldi af hendi manna í slíkum valdastöðum," útskýrir Guðrún. „Þá er ég ekki einungis að tala um kirkjuna heldur einnig fleiri þjóðfélagsstofnanir. Mörg málanna eru fyrnd og sumir þeirra ofbeldismanna sem um er að ræða eru dánir. En eftir sitja konur og karlar sem umræðan að undanförnu hefur hreyft við, þannig að þetta fólk er í uppnámi. Það er langt síðan að ég minnist þess að samfélagsumræða hafi skilað fjölgun á borð við þessa inn til okkar."

Guðrún segir að fólkið sem leiti nú til Stígamóta komi til að tjá sig um löngu liðin atvik sem séu núna að trufla daglegt líf þess. „Fyrir fólki er draumurinn um viðurkenningu á ofbeldinu ný tilfinning þó að sjaldnast sé hægt að uppfylla hann. En segja má að það sé skref í rétta átt að fólk geri kröfur fyrir sjálft sig. Að sumu leyti er þarna um að ræða jákvæð áhrif í kjölfar málsins hennar Sigrúnar Pálínu Ingvarsdóttur og fleiri kvenna," segir Guðrún. - jss