Hryðjuverkamenn ráðast á kjörstaði í Afganistan

Hryðjuverkamenn hafa gert árásir á kjörstaði og nágrenni þeirra víða um Afganistan í dag en Afganir ganga nú til þingkosninga.

Þetta eru fyrstu kosningar í landinu frá umdeildum forsetakosningum í fyrra þar sem almennt er talið að vítækt kosningasvindl hafi átt sér stað.

Tveir menn féllu í eldflaugaárás í Baghlan héraði tveimur klukkustundum eftir að kjörstaðir opnuðu í morgun, en engan sakaði þegar bílsprengja sprakk í Kandahar sem talið er að ætlað hafi verið að granda ríkisstjóra héraðsins.

Talibanar hafa náð að koma í veg fyrir að nokkrir kjörstaðir yrðu opnaðir á áhrifasvæðum sínum og hafa líka meinað fólki að fara annað til að kjósa.

Tvö þúsund og fimm hundruð frambjóðendur keppa um 249 sæti á afganska þinginu og er hluti þingsætanna sérstaklega ætlaður konum.