Segja nóg komið af áhættufjárfestingum hjá lífeyrissjóðum

Stjórn Farmanna og fiskimannasambands Íslands gagnrýnir kaup Framtakssjóðs Íslands á eignarhaldsfélaginu Vestia ehf. af Landsbankanum. Stjórnin telur að með kaupunum hafi stjórn sjóðsins farið langt út fyrir þann ramma sem lagður var til grundvallar þegar hlutverk sjóðsins var kynnt fyrir stjórnum þeirra lífeyrissjóða sem gert er ráð fyrir að standa muni að fjármögnun Framtakssjóðsins.

Stjórn FFSÍ telur að byrjað hafi verið á öfugum enda, þar sem ekki hafi á nokkurn máta verið sýnt fram á að kröfu um ávöxtun sé fullnægt. Í tilkynningu sem FFSÍ sendi frá sér segir að stjórnin leggur áherslu á að nú þegar sé meira en nóg komið af áhættufjárfestingum hjá lífeyrissjóðum íslensks launafólks.

Gengið var frá kaupum Framtakssjóðs á Vestia í síðasta mánuði. Þau félög sem fylgja Vestia eru Plastprent, Húsasmiðjan, Teymi og sjávarútvegsfyrirtækið Icelandic.