Feministar fagna afstöðu Jóns gegn klámi

Femínistafélag Íslands fagnar því að Jón Gnarr borgarstjóri skuli taka skýra afstöðu gegn klámi og skilji skaðsemi þess samkvæmt tilkynningu sem félagið sendi frá sér.

Ástæðan eru ummæli Jóns Gnarrs við AFP fréttastofuna þar sem hann sagðist helst skoða klám á netinu.

Í tilkynningu frá feministum segir:

„Klámiðnaðurinn þrífst á eymd fólks, sér í lagi kvenna og auk þess hafa rannsóknir sýnt fram á að klám hefur mjög neikvæð áhrif á það hvaða augum karlar líta á kynlíf og jafnrétti í samböndum. Femínistafélagið vonar að í kjölfarið opnist fyrir umræðuna um hin grimma heim klámiðnaðarins og tengsl hans við klámvæðingu, vændi, mansal og nauðganir.

Til að gefa Jóni tækifæri til að fræðast enn frekar um skaðsemi kláms og þau vandamál sem iðnaðinum fylgja hafa meðlimir Femínistafélagsins afhent Jóni eintak af heimildamyndinni The Price of Pleasure, en þar er fjallað um þau viðtæku áhrif sem klámiðnaðurinn hefur á samfélagið.

Femínistafélagið vill einnig hvetja þá sem hafa áhuga á að kynna sér skaðsemi kláms til að nálgast heimildamyndina."