Samband Jóns og Össurar eins og erfitt hjónaband

Sigmundur Davíð Gunnlaugsson kvaddi sér hljóðs á þingi í dag til þess að ræða heilsufar Össurar Skarphéðinssonar utanríkisráðherra. Sigmundi finnst Össur hafa haft allt á hornum sér síðustu daga og að hann hafi ráðist að þingmönnum „á alla kanta að minnsta tilefni."

Sigmundur nefndi sérstaklega Jón Bjarnason landbúnaðar- og sjávarútvegsráðherra og Vigdísi Hauksdóttir þingmann framsóknarmanna sem dæmi um þingmenn sem hefðu orðið fyrir aðkasti frá Össuri. Sigmundur spurði síðan: „Hvað er að plaga hæstvirtan utanríkisráðherra?"

Össur svaraði því til að hann komi býsna vel undan sumri að eigin mati og að hann hafi verið í „giska góðu skapi" á þingi síðustu daga. „Ekki síst eftir að ljóst varð að hér á landi er meirihlutastjórn."

Hann tók sérstaklega fram að hann beri hlýjan hug til Framsóknarflokksins og hvað varðar Jón Bjarnason sagði Össur: „Mér þykir vænt um Jón Bjarnason."

Að sögn utanríkisráðherrans má líkja sambandi hans og Jóns við það sem kalla mætti erfitt hjónaband. „Við erum stundum ósammála og það kemur fyrir að við rífumst," sagði Össur. Það breyti því ekki að sér þyki vænt um Jón.