Fráskildir kvenkyns öryrkjar hafa það verst

Sá hópur öryrkja sem á erfiðast með að standa skil á venjulegum útgjöldum eru fráskildar konur. Þar á eftir kona frjáskildir karlkyns öryrkjar. Samkvæmt skýrslu Öryrkjabandalagsins um Lífshagi og kjör öryrkja eiga 70 prósent fráskilinna kvenna í greiðsluerfiðleikum og 57 prósent fráskilinna karla.

Marktækur munur er á afkomu öryrkja eftir hjúskaparstöðu og eiga giftir best með að standa í skilum. Á eftir þeim eru það einhleypir karlar sem eiga í minnstu greiðsluerfiðleikunum en einhleypar konur eru í nokkuð verri stöðu. Fráskildir hafa það verst.

Hátt í helmingur þeirra öryrkja sem tóku þátt í rannsókn Öryrkjabandalagsins, eða 44 prósent, segja það hafa komið fyrir á síðustu tólf mánuðum að hann eða fjölskylda hans hafi átt í erfiðleikum með að greiða hin venjulegu útgjöld, svo sem mat, ferðir og húsnæði.

Marktækt fleiri konur en karlar hafa átt í erfiðleikum með að standa undir venjulegum útgjöldu, eða 47 prósent kvenna en 38 prósent karla.

Til samanburðar má geta þess að í Húsnæðiskönnun Þjóðmálastofnunar 2007 var þessu sama spurning um erfiðleika við að greiða hefðbundin útgjöld lögð fyrir. Í þeirri könnun sögðust tæp 12 prósent svarenda hafa átt í slíkum greiðsluerfiðleikum.