Búast við að 4500 fjölskyldur þiggi jólaaðstoð

Talið er að rúmlega 4500 fjölskyldur muni leita sér aðstoðar fyrir jól, hjá fjórum af helstu hjálparsamtökum landsins.

Það er Hjálparstarf kirkjunnar, Mæðrastyrksnefnd Reykjavíkur, Rauði krosinn í Reykjavík og Hjálpræðisherinn sem standa að sameiginlegri úthlutun líkt og síðustu fimm árin.

Úthlutunin var kynnt á blaðamannafundi í vöruskemmu að Skútuvogi 3 í Reykjavík, en þar mun úthlutunin fara fram. Það eru feðgarnir Karl Steingrímsson og Aron Pétur Karlsson sem lánuðu samtökunum skemmuna.

Úthlutunin verður stór í sniðunum en stefnt er á að fylla vöruskemmuna af mat og öðru fyrir jól, og er þegar byrjað að leita til fyrirtækja í landinu.

Þeir sem þurfa að leita sér aðstoðar þurfa að skrá sig og fá þá úthlutað númeri og dagsetningu um hvenær þeir eigi að mæta.

Á forsvarsmönnum samtkanna mátti heyra að gert er ráð fyrir metfjölda í ár, en í fyrra þáðu um 4000 fjölskyldur aðstoð samtakanna. Elín Hirst talsmaður verkefnisins telur að varlega megi áætla að 4500 fjölskyldur leiti sér hjálpar fyrir þessi jól.

Á boðstólum verður matvara auk jólagjafa en þar má nefna bækur, fatnað og aðrar smávörur.

Sjálfboðaliða vantar í verkefnið og eru áhugasamir hvattir til þess að kynna sér Jólaaðstoð 2010 á Facebook, en þar er einnig hægt að skrá sig.