Sandra Bullock kemur fram í fyrsta skipti eftir skandalinn

Leikkonan Sandra Bullock hefur ekki sést opinberlega síðan upp komst um framhjáhald eiginmanns hennar, Jesse James, eftir Óskarsverðlaunahátíðina í mars, þar sem hún fékk verðlaun sem besta leikkonan í aðalhlutverki.

Það eina sem heyrst hefur frá henni var í apríl þegar hún staðfesti að hafa sótt um skilnað og leyfði myndatöku af sér með ættleiddum syni sínum frá New Orleans, Louis Bardo.

Talið var að Sandra myndi í fyrsta skipti láta sjá sig á kvikmyndaverðlaunahátíð MTV í kvöld en öllum að óvörum mætti hún einnig á verðlaunahátíð Spike TV í Los Angeles í gærkvöldi. Þar tók hún á móti verðlaunum sem voru valin af fólki í Bandaríkjaher.

Robert Downey Jr. afhenti henni verðlaunin. Hún sagði stuttan brandara um hversu þröngur kjóllinn hennar var og þakkaði fyrir sig en minntist ekkert á vandræði einkalífsins.