Konan með ennistattúið biður Söndru afsökunar

Fyrirsætan Michelle Bombshell McGee kom fram í sjónvarpsþætti í Ástralíu í gær full iðrunar. Michelle Bombshell hefur unnið sér það helst til frægðar að halda við Jesse James, eiginmann leikkonunnar Söndru Bullock, og er greinilega byrjuð að reyna að rétta sinn hlut í fjölmiðlum. "Ég vil biðja Söndru afsökunar. Jesse er algjör lygamörður og ætti frekar að fara í lygameðferð frekar en kynlífsmeðferð," sagði hún með kökkinn í hálsinum. Hún bætti við að James hefði logið því að hann væri einhleypur og byggi ekki með Söndru. Hún hafi verið blekkt eins og Sandra og eigi því samúð fólks skylda. "Ég var plötuð alveg jafn mikið og hún. Ef hann hefði komið hreint fram værum við ekki í þessu veseni. Fólk heldur kannski að ég sé vondi gæinn í þessarri sögu en ég vil bara minna á að það er mér að þakka að þetta er komið fram í dagsljósið," sagði Michelle, sem hélt við James í 11 mánuði.