Sandra sneri á Jesse í hjúskaparsáttmála

Slúðurpressan vestanhafs greinir nú frá því að Sandra Bullock vinni hörðum höndum að því með lögmönnum sínum að útbúa skilnaðarpappírana. Þetta kemur fæstum á óvart þar sem eiginmaður hennar, vélhjóla- raunveruleikaþáttaplebbinn Jesse James hefur lítið getað varið framhjáhald sitt síðustu ár. Skiptir þar litlu þó hann skrái sig í og úr kynlífsmeðferð og lýsi vanlíðan og eftirsjá í fjölmiðlum. Bullock er þekkt fyrir gott viðskiptavit. Haft er eftir innanbúðarfólki að lítið mál verði fyrir hana að ná góðri lendingu í skilnaðinum þar sem hún hafi sett inn klausu í hjúskaparsáttmála þeirra þar sem kemur fram að hann fái ekki eyri af hennar auði ef upp kemst um framhjáhald. Klausan kemur sér aldeilis vel þar sem tala viðhaldanna hleypur frá fjórum upp í sjö. Er þar fremst í flokki konan með ennistattúið, Michelle "Bombshell" McGee, sem er nú þegar byrjuð að bóka sig á ýmsar uppákomur í krafti nýtilkominnar frægðar.