Geisladiskar lifa góðu lifi á Íslandi

Geisladiskar með íslenskri tónlist lifa enn góðu lífi þó að sala á erlendri tónlist hafi dregist saman, segir Ásmundur Jónsson, framkvæmdastjóri Smekkleysu og formaður Félags hljómplötuframleiðenda. Eins og fram kom á Vísi um helgina benda tölur frá Billboard til þess að sala á geisladiskum þar í landi hafi komist í sögulegt lágmark í sumar.

„Hann lifir ágætu lífi hér, allavega þegar tekið er tillit til innlendrar tónlistar," segir Ásmundur í samtali við Vísi. Hann bendir þó á að sala á erlendum geisladiskum hafi dregist verulega saman. Skýringin sé einkum gengishrunið sem varð árið 2008 og hækkaði verð á geisladiskum eins og öðrum innfluttum vörum. „Ég held að það sé skýring, því að ég tel að það sé ekki minni áhugi á tónlist," segir Ásmundur.

„Það er svolítið erfitt að eiga við svona snöggar breytingar eins og gengishrunið. Það ýtir kannski enn frekar undir þann málstað sem haldið hefur verið á lofti hjá bókaframleiðendum, að það er skelfileg tilhugsun ef menn ætla að fara að hækka virðisaukaskattinn á menningarstarfsemi eins og tónlistina sem hefur haft gríðarlega mikla þýðingu fyrir þjóðina og jákvæð áhrif útávið," segir Ásmundur.

Þá bendir Ásmundur á að þeir sem kaupi tónlist stafrænt greiði hærri virðisaukaskatt heldur en þeir sem kaupi tónlist á geisladiskum. Tónlistarútgefendur berjist fyrir því að fá lækkun á virðisaukaskatt á tónlist sem seld er starfænt, enda komi núverandi fyrirkomulag í veg fyrir nýsköpun.