Tiger Woods skilinn

Kylfingurinn Tiger Woods og Elin Nordegren eru skilin. Í yfirlýsingu frá hjónunum sem birt var í dag á heimasíðu Tiger Woods kemur fram að þau muni hafa sameiginlegt forræði yfir börnum sínum. Yfirlýsing þeirra hljóðar svo:

„Við erum sorgmædd að hjónaband okkar er á enda og óskum hvort öðru alls hins besta. Þó við séum ekki lengur gift eigum við tvö yndisleg börn saman. Hamingja barna okkar hefur verið, og mun alltaf verða, gríðarlega mikilvæg fyrir okkur bæði. Þegar við komumst að þeirri niðurstöðu að við vildum skilja að skiptum var mesta áherslan á að tryggja að framtíð þeirra verði eins og best verður á kosið. Á komandi vikum og mánuðum mun reyna mjög á börnin okkar og það verður erfitt fyrir bæði þau og okkur að laga okkur að nýjum fjölskylduástæðum. Þess vegna leggjum við höfuðáherslu á að einkalíf okkar verði virt."