Strætó kominn á vetraráætlun

Vetraráætlun Strætó hefur tekið gildi sem þýðir að tíðni ferða eykst á ný og verður svipuð og síðastliðinn vetur. Jafnframt breytist akstur um Grafarvog og Grafarholt nokkuð með nýrri vetraráætlun.

Tíðni strætóferða eykst á níu strætóleiðum með nýrri vetraráætlun, að því er fram kemur í tilkynningu. Leiðir 2, 3, 4, 11, 12, 14 og 15 aka nú á 15 mínútna tíðni á annatíma, það er 6:30-9:00 og 14:00-18:00, á virkum dögum í stað 30 mínútna tíðni í sumar, og leiðir 1 og 6 aka á 15 mínútna tíðni frá kl. 6:30 til kl. 18 á virkum dögum. Fram kemur í tilkynningunni að árstíðabundnar breytingar á akstri Strætó fylgi eftirspurn. Jafnan dragi úr notkun strætó yfir sumartímann þegar skólar séu ekki starfandi og fólk taki sumarfrí. Eftirspurnin eykst á ný upp úr miðjum ágústmánuði sem er mætt með aukinni tíðni ferða yfir veturinn.

Breytingar í Grafarvogi og Grafarholti

Með nýrri vetraráætlun breytist jafnframt akstur um Grafarvog og Grafarholt nokkuð, því héðan í frá mun leið 6 tengja saman flest hverfi Grafarvogs og fara um Borga- og Staðahverfi á 15 mínútna fresti á virkum dögum en á 30 mínútna fresti á kvöldin og um helgar. Leið 6 mun jafnframt aka um Grafarholtið á kvöldin og um helgar og þannig tengja hverfið við nánast allt frístundastarf í Grafarvogi á þeim tímum. Leiðir 31 og 32 sem áður keyrðu um Grafarvoginn munu hins vegar hætta akstri.

Þessar breytingar í Grafarvogi voru unnar af þverpólitískum vinnuhópi og voru kynntar fyrir íbúum svæðisins á íbúafundi þann 14. janúar 2010.

„Talningar okkar síðustu árin hafa sýnt að farþegar í Grafarvogi hafa notað leið 6 mun meira en 31 og 32, jafnvel þótt þeir hafi þurft að ganga lengra í strætó. Því er farin þessi leið að færa leið 6 nær íbúum hverfisins, sem hefur það m.a. í för með sér að aksturstíðni um hverfið eykst á dagtíma og börn geta ferðast um hverfið til frístundastarfs án þess að skipta um vagn," segir Einar Kristjánsson, sviðsstjóri skipulags- og þróunarsviðs Strætó bs, í tilkynningunni. „Breytingarnar fela ekki í sér sparnað fyrir Strætó, en það er von okkar að með þessu sé þjónustan betur sniðin að þörfum íbúa Grafarvogs."