Í fangelsi fyrir að kasta glasi í lögreglukonu

23 ára kona var dæmd í dag í átta mánaða fangelsi fyrir að kasta bjórglasi í höfuð lögreglukonu í nóvember á síðasta ári.

Konan var að skemmta sér á 800 Bar á Selfossi þegar lögreglan kom á vettvang til þess að fjarlægja æstan mann ótengdum konunni. Lögreglukonan ætlaði að fara inn á skemmtistaðinn til að ræða við dyraverðina.

Þá stóð hin dæmda fyrir dyrunum. Lögreglukonan vísaði henni frá dyrunum með því að taka í hana og færa hana frá. Konan, sem stóð 2-3 metra frá lögreglukonunni, brást illa við tilmælum hennar og kastað glasi, sem hún hafi haldið á, af afli í átt að lögreglukonunni. Í þann mund snéri lögreglukonan sér við og lenti glasið þá í enni hennar.

Glasið brotnaði þegar það skall í jörðina. Konan fékk stóra bólgukúlu á ennið eins og það er orðað í dómnum.

Í niðurstöðu Héraðsdóms Suðurlands segir að konan hafi neitað sök. Hún hafi hinsvegar verið verulega ölvuð og því ekki munað vel eftir atburðinum. Hún var hinsvegar sakfelld á framburði lögreglunnar.

Þá segir í niðurstöðu dómsins að konan hafi ekki áður gerst sek um refsiverðan verknað.

Nokkuð er um liðið síðan atvikið varð og hefur hin konan lagt stund á háskólanám.

Árás hennar gagnvart lögreglukonunni, sem var að sinna skyldustörfum sínum, var með öllu tilefnislaus og segir í niðurstöðu dómsins að hún lýsi skeytingarleysi og virðingarleysi gagnvart lögreglu sem hafði lögmæt og eðlileg afskipti af konunni umrætt sinn.

því þyki hæfilegt að dæma hana í átta mánaða fangelsi. Þá vekur sérstaka athygli að aðeins 6 mánuðir refsingarinnar eru skilorðsbundnir og falla niður að þremur árum liðnum. Konan þarf því að afplána tvo mánuði í fangelsi þrátt fyrir að vera með hreina sakaskrá.

Ekki þótti skipta máli að það var lögreglan á Selfossi sem rannsakaði málið þrátt fyrir að lögreglukonan starfaði þar og gerir enn.