Fjórir sóttu um starf tæknistjóra stjórnlagaþings

Finnur Pálmi Magnússon tölvunarfræðingur hefur verið ráðinn sem tæknistjóri stjórnlagaþings. Hann starfaði sem verktaki fyrir Þjóðfundinn og sinnti tæknimálum fundarins og vefmálum. Á Þjóðfundinum var lagður grunnur að starfi stjórnlagaþings.

Fjórir sóttu um stöðuna og voru tveir boðaðir í viðtal.

Staða tæknistjóra stjórnlagaþings var auglýst í byrjun nóvember og gengið frá ráðningunni í gær.

Þá var einnig gengið frá ráðningu upplýsingafulltrúa stjórnlagaþings, eins og Vísir greindi frá í morgun. Samkvæmt upplýsingum frá skrifstofu stjórnlagaþings voru fjórir boðaðir í viðtal vegna þeirrar stöðu, en 22 sóttu um.

Ráðningin er tímabundin og í samræmi við ákvæði laga um stjórnlagaþing er hún gerð með fyrirvara um samþykki forsætisnefndar stjórnlagaþings sem verður kosin er þingið kemur saman í febrúar næstkomandi. Fram að því mun upplýsingafulltrúi einkum sinna uppsetningu vefsíðu og öðrum undirbúningi þingsins ásamt framkvæmdastjóra.

Fleiri störf á skrifstofu stjórnlagaþings verða auglýst á næstunni.