Aðstæður á flóðasvæðunum ógna velferð barna

„Miklir fólksflutningar í kjölfar flóðanna, hætta á útbreiðslu sjúkdóma og versnandi lífsskilyrði fela í sér aukna áhættu fyrir heilsu ungra barna," segir Mohammed Qazilbash, talsmaður Barnaheilla - Save the Children í Pakistan. Þetta kemur fram í tilkynningu frá Barnaheillum.

Save the Children hafa undanfarnar tvær vikur veitt um 38 þúsund börnum og fullorðnum neyðaraðstoð. Aðstæður eru mjög erfiðar og vinna samtökin að því að ná til fjölskyldna sem þurfa á hjálp að halda. Barnaheill - Save the Children hafa sérstakar áhyggjur af heilsu ungra barna á flóðasvæðunum.

„Milljónir manna eru heimilislausar og hafa misst allar eigur sínar og lifibrauð sitt og geta ekki lengur brauðfætt börnin sín. Það eru engar ýkjur að segja að við erum í kapphlaupi við tímann til að geta veitt fólki í sárri neyð aðstoð," segir Qazilbash.

Barnaheill - Save the Children stefna að því að aðstoða 600 þúsund manns næstu sex mánuði og er áætlaður kostnaður um 1,8 milljarður króna (15 milljónir USD). Samtökin hafa þegar safnað tæplega helmingi þeirrar upphæðar víða um heim. Þeir sem vilja leggja málefninu lið geturðu hringt í söfnunarsíma Barnaheilla -Save the Children á Íslandi 904-1900 og 904-2900 eða lagt framlög inn á bankareikning samtakanna. Nánari upplýsingar er að finna á www.barnaheill.is