Sjálfstæðismenn mega vel við una í þéttbýliskjörnunum

Sjálfstæðisflokkurinn bætir við sig fylgi og bæjarfulltrúum í helstu þéttbýliskjörum landsins á meðan Samfylkingin tapar mönnum víða. Í Hafnarfirði eru Sjálfstæðismenn að bæta við sig tveimur mönnum á meðan Samfylkingin fer úr sjö bæjarfulltrúum í fimm. Því eru flokkarnir jafn stórir þó svo að Samfylkingin hafi hlotið betr kjörfylgi.

Í Garðabæ, sem hefur ávallt verið sterkt vígi Sjálfstæðismanna, bæta þeir við sig manni. Þess má þó geta að Samfylkingin býður sig nú fyrst fram í bænum undir merkjum flokksins. Þeir ná einum manni. Áður bauð A-listinn sig fram og var með þrjá menn.

Í Kópavogi tapa Sjálfstæðismenn eins og Samfylkingin. Báðir flokkarnir tapa manni en þar voru tvö ný framboð sem bæði náðu manni inn.

Sjálfstæðisflokkurinn tapar tveimur mönnum í Reykjavík á meðan Samfylkingin tapar einum manni. Fylgið fer beint til Besta flokksins sem vann afgerandi sigur eða sex borgarfulltrúa.

Í Mosfellsbæ bætir Sjálfstæðisflokkurinn við sig manni á meðan Samfylkingin tapar einum bæjarfulltrúa. Þeir eru því með einn bæjarfulltrúa í bænum en Sjálfstæðisflokkurinn er með fjóra.

Sjálfstæðisflokkurinn vinnur svo frekar stóra sigur í Árborg en þar ná þeir fimm mönnum og bæta við sig einum. Samfylkingin heldur sínum tveimur.

Akureyri er hinsvegar blóðugt vígi fyrir fjórflokkana líkt og í Reykjavík. Þar tapa Sjálfstæðismenn þremur mönnum en Samfylkingin tapar tveimur. Báðir flokkarnir eru því með einn mann en L-listinn náði hreinum meirihluta í kosningunum þar í bæ.

Vinstri grænir hinsvegar halda vígi víðast hvar en bæta engum við sig af fyrrnefndum sveitarfélögum.

Á Ísafirði halda Sjálfstæðismenn sínum fjórum mönnum. Samfylkingin býður sig ekki fram þar.