Börðust við eld í Straumsvík í tvo tíma

Slökkviliðið á höfuðborgarsvæðinu barðist í tvo tíma við eld í álverinu í Straumsvík í gærkvöldi. Eldurinn kom upp á tíunda tímanum í kjallara steypuskála álversins og er talið hugsanlegt að bráðið ál hafi lekið í kjallarann og kveikt þar í rafmagnsköplum.

Í tilkynningu frá álverinu sem barst í nótt segir að ekki sé ljóst hversu mikið tjón hafi orðið í brunanum en ljóst sé að einhver truflun muni verða á starfsemi álversins. Engin slys urðu á fólki en umtalsverður reykur fylgdi brunanum.