Útgjöld drógust saman um 27%

Útgjöld til löggæslu, réttargæslu og öryggismála drógust saman um tæp 27% á fyrstu sex mánuðum ársins miðað við sama tímabil í fyrra, samkvæmt greiðsluuppgjöri ríkissjóðs sem birt var fyrr í vikunni. Þau fóru úr um það bil 12,3 milljörðum í um það bil 9 milljarða.

Þær skýringar fengust frá dóms- og mannréttindamálaráðuneytinu að ekki væri um að ræða svo mikinn niðurskurð á rekstrarkostnaði. Skýringin á þessum samdrætti væri sú að í fyrra hefðu 3,4 milljarðar farið í kaup á nýrri flugvél fyrir Landhelgisgæsluna. Ekki væri verið að greiða af þeirri flugvél í ár. Flugvélin hefur meðal annars verið notuð í mengunareftirlit og nýttist vel þegar eldgosið í Eyjafjallajökli kom upp í vor, samkvæmt upplýsingum frá ráðuneytinu.

Samkvæmt upplýsingum frá dóms- og mannréttindamálaráðuneytinu lækkuðu útgjöld til ráðuneytisins saman um 10% á fjárlögum þessa árs og er búist við að um svipaða lækkun verði að ræða á fjárlögum fyrir næsta ár.