Samningaviðræður vel á veg komnar

Samningafundur milli Landssambands slökkviliðs- og sjúkraflutningamanna hefur staðið yfir frá því um eittleytið í dag. Viðræður hafa gengið vel í dag samkvæmt upplýsingum Vísis.

Þrjár verkfallslotur slökkviliðs- og sjúkraflutningamanna hafa gengið yfir að undanförnu og nú er í gildi yfirvinnubann. Varaslökkviliðsstjórinn á höfuðborgarsvæðinu sagði í kvöldfréttum Stöðvar 2 í gær að verkfallið kynni að hafa áhrif á Reykjavíkurmaraþon og menningarnótt.

Samkvæmt heimildum Vísis er hins vegar byrjað að hræra í vöfflur í húsnæði Ríkissáttasemjara. Það þýðir að samningaviðræður eru á endasprettinum og allt útlit fyrir að samningar muni klárast í dag. Hjá Ríkissáttasemjara vildu menn hins vegar ekki staðfesta þessar fréttir.