Fagnar rannsókn á starfsemi lífeyrissjóðanna

Ögmundur Jónasson, þingmaður VG, fagnar rannsókn á starfsemi lífeyrissjóðanna í aðdraganda bankahrunsins. Hann segir lífeyrissjóðina sýna mikilvægt frumkvæði en það hafi stjórnvöld ekki gert.

Rannsóknarnefnd skipuð af ríkissáttasemjara mun framkvæma úttekt á fjárfestingastefnu, ákvarðanatöku og lagalegu umhverfi lífeyrissjóðanna í aðdraganda bankahrunsins. Gert er ráð fyrir því að nefndin ljúki störfum fyrir árslok. Stjórn og varastjórn Landssamtaka lífeyrissjóða ákvað á fundi sínum í lok júní að fara þessa leið og var ríkissáttasemjara falið að tilnefna þrjá einstaklinga í nefndina. Hrafn Bragason, lögfræðingur og fyrrverandi hæstaréttardómari, verður formaður rannsóknarnefndarinnar.

„Þetta er mjög gott framtak og í samræmi við það sem ég hef áður lagt til sjálfur," segir Ögmundur. „Það er mikilvægt að fram komi hvernig stjórnendur lífeyrissjóðanna stóðu að fjárfestingum sínum og hvernig þeir gættu hagsmuna eigenda lífeyrissjóðanna sem er launafólkið í landinu."

Stjórnvöld sýndu ekki frumkvæði

Aðspurður segir Ögmundur að hugsanlega hefði verið heppilegra að stjórnvöld skipuðu rannsóknarnefnd til að fara yfir starfsemi lífeyrissjóðanna. Hann ætli þó ekki að lasta þetta framtak.

„Það skrifast miklu frekar á stjórnvöld fremur en lífeyrissjóðina þar sem stjórnvöld sýndu ekki frumkvæði og lífeyrissjóðirnir bregðast sjálfir við með þessum hætti. Reyndar fyrir áeggjan margra lífeyrisþega í nokkuð langan tíma."

Ögmundur segir að mestu máli skipta að nefndinni takist vel upp í störfum sínum.