Kyrrsetning eigna rýmkuð

Skattrannsóknarstjóri er að skoða hvort krafist verði kyrrsetningar eigna í um þrjú hundruð málum. Ríkisstjórnin hyggst rýmka heimildir embættisins til að krefjast kyrrsetningar eigna.

30. mars síðastliðinn voru samþykktar breytingar á lögum um tekjuskatt sem meðal annars fela í sér að skattrannsóknarstjóra er heimilt að krefjast kyrrsetningar hjá skattaðila, til tryggingar greiðslu væntanlegrar skattkröfu, ef hætta þykir á að eignum verði skotið undan eða þær glatist eða rýrni.

Á borði skattrannsóknarstjóra var rannsókn á vangreiddum virðisaukaskatti í rekstri FL Group og var farið fram á að eignir fjögurra fyrrverandi forsvarsmanna félagsins yrðu kyrrsettar vegna málsins. Skarphéðinn Berg Steinarsson, fyrrverandi stjórnarformaður FL Group, var einn þeirra en hann fór með málið fyrir dómstóla og hafði sigur úr býtum þar sem heimildin náði ekki til virðisaukaskattsbrota. Eftir þetta féll skattrannsóknarstjóri frá kyrrsetningarbeiðni á eignum fjórmenninganna.

Ríkisstjórnin hyggst nú rýmka þessar heimildir þannig að þær nái einnig til staðgreiðslu og virðisaukaskattsbrota.

Steingrímur J. Sigfússon, fjármálaráðherra, segir aðspurður að hljóti slíkt frumvarp samþykki Alþingis verði hægt að ganga að eignum þeirra sem reynt var að kyrrsetja í máli FL Group. „Þetta myndi þá taka til allra mála sem rannsókn er hafin á."

Bryndís Kristjánsdóttir, skattrannsóknarstjóri, sagði í samtali við fréttastofu að 300 mál séu á borði embættisins og verið sé að skoða í hvaða málum krafist verði kyrrsetningar. Niðurstaða þeirrar könnunar mun liggja fyrir síðar í haust.