Viðurkennir kunningjatengsl við framkvæmdastjórann

Það er víðs fjarri að ferlið í aðdraganda að ráðningu nýs framkvæmdastjóra Íslandsstofu hafi verið eitthvað leikrit, segir Friðrik Pálsson, formaður stjórnar Íslandsstofu. Tilkynnt var fyrr í vikonnu að Jón Ásbergsson, fyrrverandi framkvæmdastjóri Útflutningsráðs, hefði verið ráðinn í starfið. Þórólfur Árnason, fyrrverandi borgarstjóri, var á meðal umsækjanda um starfið en hann segir að umsóknarferlið hafi verið leikrit

„Það er víðs fjarri að það sé um eitthvað leikrit að ræða. Þórólfur Árnason verður bara að eiga það við sig hvernig hann villl koma fram í þessu máli," segir Friðrik í samtali við Vísi. Friðrik fullyrðir að faglega hafi verið staðið að ráðningunni. „ Við vönduðum okkur í því máli í hvívetna," segir Friðrik.

Friðrik neitar því að að nýráðinn framkvæmdastjóri sé vinur sinn en viðurkennir kunningjatengsl. „Ég á tiltölulega fáa vini. Ég á marga kunningja, gríðarlega marga og Jón Ásbergsson er klárlega einn af þeim," segir Friðrik. Friðrik segir þó að hvorki hann né aðrir stjórnarmenn beitt sér hafi beitt sér í þágu einhverra umsækjenda. „Hvorki fyrir Jón Ásbergsson né annan umsækjanda," segir Friðrik.

Þórólfur Árnason gagnrýnir það að Jón Ásbergsson hafi skrifað blaðagrein þar sem hann titlaði sig sem framkvæmdastjóra Íslandsstofu áður en lokið var við ráðningu hans. Friðrik svarar því til að Jón hafi verið starfandi framkvæmdastjóri á meðan að á ráðningaferlinu stóð, enda hafi Íslandsstofa tekið yfir verkefni Útflutningsráðs, auk fleiri verkefna.