Rannsókn á banaslysinu á Grundartanga lokið

Stjórnendur Elkem á Íslandi, sem rekur járnblendiverksmiðjuna á Grundartanga, hafa í kjölfar banaslyss sem varð þegar sprenging varð í verksmiðjunni þann 29. júní síðastliðinn og rannsóknar á því tekið ákvörðun um margþættar aðgerðir til þess að auka enn frekar öryggi starfsemi sinnar.

Í tilkynningu frá Elkem segir að fyrr í þessari viku hafi hafist vinna við að endurræsa ofninn sem eldurinn slapp úr. Yfirumsjón og meginþungi rannsóknarinnar hefur hvílt á sérfræðingum frá móðurfélaginu Elkem AS í samstarfi við starfsmenn verksmiðjunnar á Íslandi. Vinnueftirlitið hefur frá upphafi fylgst með framgangi rannsóknarinnar og var ákvörðun um að gangsetja ofninn á nýjan leik tekin í samráði við stofnunina. Niðurstöður í sjálfstæðri rannsókn Vinnueftirlitsins á tilurð slyssins liggi einnig fyrir.

Nú þegar niðurstöður á rannsóknum á slysinu liggja fyrir hafa stjórnendur Elkem ákveðið að verksmiðjan muni einungis sinna framleiðslu járnblendis með að minnsta kosti 65% kísilinnihaldi, en slysið varð við framleiðslu á svokölluðu 55% kísiljárni. Hráefnisskammtar verða minnkaðir verulega í öllum ofnum verksmiðjunnar og hráefnismötun verður tölvustýrð. Með aukinni sjálfvirkni verður vinna á svokallaðri skörungshæð þar sem slysið átti sér stað minnkuð verulega og það tryggt að starfsmenn á hæðinni þurfi ekki að fara út úr vinnuvélum sínum. Þá hefur verið gripið til ýmissa fleiri ráðstafana, ýmsar vinnureglur hertar og þjálfun starfsfólks vegna nýs vinnulags aukin enn frekar.