Jóhanna tók þátt í ráðstefnu kvenleiðtoga

Jóhanna Sigurðardóttir forsætisráðherra tók í gær þátt í ráðstefnu kvenleiðtoga í New York. Yfirskrift ráðstefnunnar var „Konur sem mikilvægt afl í lýðræðislegri stjórnsýslu". Forseti Litháen, Dalia Grybauskaite og forseti Finnlands, Tarja Halonen voru gestgjafar ráðstefnunnar.

Á meðal ræðumanna í pallborði voru Michelle Bachelet sem nýlega tók við embætti framkvæmdastjóra stofnunar Sameinuðu þjóðanna um málefni kvenna (UN Women) og forsetar Líberíu og Kirgistan.

Jóhanna þekktist nýlega boð um að gerast meðlimur í ráði kvenleiðtoga (Council of Women World Leaders), sem stóð að ráðstefnunni. Í tilkynningu frá forsætisráðuneytinu segir að ráðið sé vettvangur núverandi og fyrrverandi kvenleiðtoga, þ.e. forseta og forsætisráðherra.

Meðal meðlima er Angela Merkel, Mary Robinson og Gro Harlem Brundtland en Vigdís Finnbogadóttir var einn helsti hvatamaður og stofnandi ráðsins.