Lánakerfinu verði breytt

Hagsmunasamtök heimilanna vilja að húsnæðislánakerfinu á Íslandi verði breytt verulega og varanlega, að því er fram kemur í fréttatilkynningu samtakanna.

Samtökin leggja til að sett verði fjögurra prósenta þak á verðbætur verðtryggðra húsnæðislána, sem lækki í þrepum þar til hætt verði að nota verðtryggð lán. Á óverðtryggð húsnæðislán verði svo sett fimm til sex prósenta þak á vexti og þeir verði ákvarðaðir til þriggja til fimm ára í senn.

Þá leggja samtökin til að gengistryggðum húsnæðislánum, húsnæðislánum í erlendri mynt og erlendum húsnæðislánum verði breytt í verðtryggð krónulán miðað við stöðu þeirra um áramótin 2007. Einnig vilja þau að höfuðstóll verðtryggðra lána miðist við árslok 2007.

Samtökin segja tillögurnar sjálfsagt virka róttækar en þær myndi góða, sanngjarna og framkvæmanlega heild. Tillögurnar kalla samtökin grunn að þjóðarsátt. - þeb